Rrapi i Libohovës është një trung (dru) rrapi i cili gjendet në qendër të qytetit të Libohovës të rrethit të Gjirokastrës.
Rrapi i Libohovës është i shekullit të XVI. Historia e këtij rrapi shekullor vjen nga një berber i cili mori një shkop në formën e një kliçoje dhe e nguli në tokë për të mbajtur një kanë me ujë. Ky dru u rrit vetë dhe sot gjendet një pemë gjigante me degët e tij që shkojnë deri në 25 metra lartësi dhe varen duke u përdredhur drejt tokës.
Kjo pemë gjigante me trungun 6.5 metra dhe me kurorë që zë një hapësirë rreth 800-900 metra, brenda kurorës së rrapit ka aq hapësirë sa të ndërtosh një vilë pa e prekur fare rrapin. Më interesante është se pema nuk thahet kurrë dhe degët e këtij rrapi lidhen me njëra-tjetrën duke formuar një labirint degësh dhe një bukuri madhështore.
Si një çati e një shtëpie të madhe që do të qëndronte pa trarët dhe muret. Në këtë vend ka qëndruar dhe Lord Bajroni, fjalët e të cilit për këtë vend kanë qenë: “Libohova është një vend i bukur natyror dhe këtu kam provuar gjellët më të shijshme dhe kam parë vajzat më të bukura…”
Sot rrapi i Libohovës është një prej destinacioneve të preferuara për turistët që vizitojnë jugun e vendit. Dy vjet më parë ai u rrezikua të prekej prej një sëmundje të rrallë, e cila thau disa rrepe të tjerë pranë tij. Por falë ndërhyrjes në kohë me kimikate dhe pesticide, u arrit që rrapi të mos dëmtohej.
