Duke pasur parasysh se vera ka kaluar dhe se ditët e ftohta karakteristike të vjeshtës dhe dimrit janë para nesh, ne duhet të përgatisim trupin tonë dhe t`i sigurojmë atij një imunitet më të mirë. Vitaminat dhe suplementet janë çelësi për forcimin e sistemit imunitar, dhe secila prej tyre ka një qëllim të ndryshëm.
Vitamina D
Vitamina D është e nevojshme për të rregulluar kalciumin dhe fosfatin në trupin tonë, në mënyrë që kockat, muskujt dhe dhëmbët tanë të jenë të shëndetshëm. Trupi ynë ka nevojë për një shtesë të kësaj vitamine, rreth 10 mikrogramë në ditë.
Gjatë vjeshtës dhe dimrit, njerëzit kalojnë më pak kohë jashtë, kështu që mundësia që trupi të prodhojë vitaminë D për shkak të ekspozimit ndaj dritës së diellit, e cila është gjithnjë e më pak në atë periudhë, zvogëlohet.
Hekur
Mungesa e hekurit është forma më e zakonshme e anemisë, dhe simptomat përfshijnë lodhje dhe mungesë energjie, gulçim, palpitacione dhe lëkurë të zbehtë.
Nëse zbuloni se jeni anemik ose keni mungesë hekuri, mjeku juaj mund të përshkruajë tableta hekuri, të cilat janë më të forta se ato që mund të blihen pa recetë.
NHS thotë se sasia e rekomanduar e hekurit është 8.7 mg në ditë për burrat mbi moshën 18-vjeç, 14.8 mg në ditë për gratë midis moshës 19 dhe 50 vjeç dhe 8.7 mg në ditë për gratë mbi moshën 50-vjeç.
Vitaminë C
Vitamina C përdoret për të mbajtur qelizat të shëndetshme, së bashku me lëkurën, enët e gjakut, kockat. Gjithashtu ndihmon në shërimin e plagëve nga prerjet dhe gërvishtjet. Vitamina C mund të zvogëlojë ashpërsinë e ftohjes sepse forcon sistemin imunitar të trupit.
Është gjithashtu e dobishme për lëkurën në periudhën më të ftohtë, kur ka më pak rrezet e diellit. Marrja e tepërt mund të jetë e dëmshme, veçanërisht për veshkat, edhe pse dihet se ekskretohet nga trupi. NHS rekomandon 40 mg vitaminë C në ditë për të rriturit midis moshës 19 dhe 64 vjeç.
Magnez
Magnezi është një mineral që ndihmon sistemin tonë imunitar dhe konverton ushqimin që hamë në energji, diçka që na nevojitet në këtë kohë të vitit.
Nivelet e ulëta të magnezit mund të çojnë në presion të lartë të gjakut, tolerancë të ulët të glukozës, por edhe probleme të shëndetit mendor, siç është depresioni.
NHS rekomandon që burrat e rritur të marrin 300 mg magnez në ditë, ndërsa për gratë është 270 mg në ditë.
